Veremundo Méndez Coarasa (Hecho, Huesca, 1897 . 1968)

Maestro, escritor y poeta en aragonés cheso.

Entre sus obras, ‘A Echo’, ‘Oza’ , ‘Las fiestas d’antis más’, ‘Ya ve iplegando setiembre’ y ‘La agonía de las campanas.

La siembra

Acabadas las trufas y sopas,

adobadas con sebo y desfeitas,

remulladas con bel trago vino,

cristianau, si ne has, u agua fresca

y alcaso azamallo,

ha la chen preparada pa siembra.

Atrapacian y chuñen y cargan,

cada cual, las bestias.

Con alforcha pa todo lo día,

con lo trigo apañau en talecas,

con l’apero colgau de lo chugo

y rastrando lo duecho por tierra,

marchan ta la bal,

otros ta laderas

de tierra ‘slavada

y con todos ta güebra,

que, movida y también travesada

y terciada, de güeña manera,

la dixeron así atrapaciada,

ya ‘n la primavera,

después que cremeron,

formigués a usenas,

abrasando, tamién, en los mismos

a las plantas rancadas de tierra,

qu’emponzoñan y matan los campos

y lis chupan lo chueco que queda.

¡Ah diaples de cardos,

grumacas, xarceras,

cenullos, ordigas,

 cerrudas, gardenchas,

 yerbagüena burro,

lastón y broxera,

sabuqueros baxos,

arto cutio, plantaina, sarguera,

solimán, anipetas y toxas

y la betiquera

los azotacristos

y las garrucheras,

las matas de buxos

y d’allagas, que punchan las perras

y te meten las zarpas crismadas,

que da rabia y pena,

porque veyes que trigo n’on pillas

y las plantas dañinas emplenan

los campos, las marguíns,

que parez que triballas pa ellas!

Te metes frioso

y a ñpoder ¡cremarías las peñas!…

Plegaus ta lo campo,

escargan las bestias,

preparan l’apero,

lo dental, en lo güembre, t’apretan;

apañan la ‘spata,

pa que dentre lo güembre.n la tierra,

lo que siga justo

u las bestias puedan.

Empecipian itándote sulcos,

que se claman puercas,

y siñalan los campos asinas,

pa guiar la siembra.

Lo que ita lo trigo a zarpaus,

ha pillau por la margin más dreita;

ve seguindo qui lleva la chunta

y en la zarpa ramals y codeta,

apretando’nta baxo, que dentre,

lo gúembre’n la tierra.

En ella se clava

y la deixa abierta,

cuando fa lo sulco

y lo trigo ’ntierra.

Ya’n ye lo primero

y pa dar la güelta,

¡Tom’arriba!, dice,

devantando l’apero de tierra,

fendo darlin, la mey’ a la chunta,

pa tornar por la misma ‘ndrecera.

En que clava’n la tierra lo güembre,

que gobiernan lo duecho y codeta,

contra lo primero,

lo segundo queda,

un  sulco a la ida

y l’otro a la güelta.

¡Toma baxo!, dice,

lo mozo que siembra,

afloxa pa darla

pero luego apreta

y a slcos a sulcos,

se’n fan una puerca.

Adezaga d’aquella, la otra

y dimpués de las dos la tercera;

d’ixa quisa te siembran lo campo,

u sino las fanegas que puedan,

si lo tajo ye mas d’una chunta,

menester ye otro día de siembra,

Allá meyo día,

han para upa chintar lo que vienga

en l’alforcha, con pan y con vino

y con la berienda.

Comen lo que siga;

muito no lis cuesta,

no bi-ha qui piense

en itar la siesta;

no ye tiempo ni branca aparente

y que, a más, si te itas, te chelas

y pillas destemple, u güen mal de muelas,

u bel resfriau

apercazau l’ebas

y por ixo, en todo el día.

No bi-ha qui lo tiempo te pierda,

porque ye mui sagrau lo triballo.

¡Ye lo pan que demandas ta tierra!...

No ye cosa que siga chocante,

pero sí, muita miga. Ixo lleva.

Tonada de trilla,

tonada de siega,

tonada de ronda,

pa bailar, la fiesta,

pero  o trovarás en la jota,

tona da de siembra…

No verez a dinguno sembrando

que cante’n faena.

El triballo qu’empleas lo cuerpo

y qu’empleas, también, la sesera.

Que si paxaricos,

que si mla tierra,

que si lo negrillo,

que si l’arbilluela,

pos miro lo muervo,

a cascabellera,

la perra viraca,

ratillas, toperas;

a ormino, cheladas,

si quieres s’aniebla,

dimpués las tronadas,

mas antis, que pleva

y si plegan calós mui de pronto,

no te grana ni branca ni meya;

si l’aire lo tumba,

tamién la fa güeña.

Y sabiendo todo ixo que sabes,

sin d’embargo siembras;

y siembras callando,

como aquel qui reza,

 que lo fer que la tierra dé frutos,

ye cosa mui seria.

Imágenes:https://www.google.com